مستنينك فى منتداك الجديد يا زائر
منتدى البطل الرومانى من هنا

 

الرئيسيةالبطل الرومانىبحـثالتسجيلدخول


شاطر | 
 

 اسكتشات عيد الميلاد وراس السنة

اذهب الى الأسفل 
كاتب الموضوعرسالة
بوسى جرجس
عضو جديد
عضو جديد
avatar

عدد المساهمات : 15
العمل : طالبة
تاريخ التسجيل : 06/11/2009

مُساهمةموضوع: اسكتشات عيد الميلاد وراس السنة   الإثنين ديسمبر 14, 2009 3:28 am

بسم الله القوى


الأب والابن والروح القدس
الإله الواحد أمين






كنيسة
الشهيد العظيم مارجرس



بعين شمس – الشرقية





اعدادى بنين - أسرةالمسرح












((( اسكتش عيد
الميلاد المجيد )))






تاليف اخراج


الخادم :-
ماجد بطرس الخادم
:- بيتر سامى









لاجل
الامانه



فكرة
الاسكتش مأخوذه من اسكتش اخر بعنوان (( بابا نويل وماكينة اللعب ))



المنظر لحجرة المكتب الخاص بابونا كيرلس
ويجلس منير فى الوسط امام جهاز غريب يشبه الكمبيوتر
ويدخل عم يونان فراش الكنيسه





يونان صباح الخير يا استاذ منير


منير صباح الخير يا عم يونان


يونان انت بايت هنا فى مكتب ابونا كيرلس من
انبارح مش كده



منير ايوه فعلا علشان نخلص كميه اللعب اللى
ابونا كيرلس طالبها مننا



يونان ربنا يعوضك يا ابنى


منير انت عارف يا عم يونان احنا بنخدم وبنتعب
علشان غيرنا يتبسط ويفرح فى العيد لكن محدش مقدر



يونان ازاى يا ابنى اكيد ربنا مقدر وشايف محبتك
للكنيسه



منير ايوه طبعا طبعا ما انا فاهم ....... انا
اقصد ان الناس ماتعرفش غير ابونا كيرلس وبس مش اللى شغالين



معاه


يونان ابونا كيرلس راجل كله بركه


منير يوووووه ...... انت مش فاهم حاجه وامال
ترغى معايا ومعطلنى



يونان معلش يا استاذ منير متزعلش منى يا ابنى
استحمل عمك يونان الغلبان انا راجل فهمى على قدى



منير فعلا انت باين عليك مفيش فهم خالص


يونان الله يسامحك يا استاذ منير معلش انا بحبك
ومش ممكن ازعل منك






(( يدخل فريد فى حاله زعل ..........
))






فريد ايه يا سى منير انت لسه مخلصتش كميه اللعب
اللى مطلوبه منك امال بايت طول الليل بتعمل ايه



منير يا اخى قول صباح الخير الاول


يونان الحقيقه يا استاذ فريد ان الاستاذ منير
تعبان فى تجهيز اللعب بتاع عيد المبلاد ومنمش طول الليل



فريد انت حد وجهلك كلام يا عم يونان خليك فى
شغلك انت فراش فى الكنيسه وبس



يونان عندك حق يا استاذ فريد انا اسف ، اصل انا
بحبكم ومش عاوزكم تتخانقوا مع بعض



فريد ده واحد كسلان ولازم يسمع كلمتين علشان
يشتغل



منير انت مالكش كلام عليه انا زييى زييك فى الكنيسه
ويمكن احسن منك كمان وابونا كيرلس هو اللى مشغلنا



مع بعض علشان نعمل هدايا عيد الميلاد بتاع
الاطفال يبقى تسمعنى كلمتين باى حق



فريد لانك ماخرنا وانتاج ماكنة اللعب قل جدا ومش
ممكن نخلص الكميه المطلوبه قبل العيد



منير وانا مالى انت عارف كويس ان مكنه اللعب دى
بتشتغل لوحدها من غير كهربا ولا حجاره او حتى بنزين



او سولار يبقى انا مالى بالانتاج اللى
قل



يونان معلش يا اولاد انشاء الله الانتاج يزيد
وتخلصوا الكميه كلها فى الميعاد ، بس انتوا ارشموا الصليب وابعدوا



عدوا الخير عنكم


منير وبعدين معاك يا عم يونان ماتخليك فى حالك


يونان معلش يا ابنى استحمل عمك يونان الغلبان


فريد انا مش قلتلك روح شوف اللى وراك ، اتفضل
روح هاتلى شويه ميه



يونان حاضر انا خدامك يا استاذ فريد بس مش عاوزك تزعل
دانا بحبكم زى ولادى واكتر صدقونى



فريد اتفضل بقى ولخص فى الكلام





(( يخرج
عم يونان ........ ))






منير انت لو اتكلمت معايا تانى بالاسلوب ده مش
هايحصلك كويس ، انا هاقول لابونا كيرلس وهو يتصرف
معاك


فريد انا اللى هاقول لابونا كيرلس يشوف واحد
غيرك مايكنش كسلان زيك



منير انا باشتغل اكتر منك انت مابتعملش حاجه





(( يتشاجر الاثنان ،،،، تتوقف ماكنه
اللعب ،،،، يدخل عم يونان معه الميه ....... ))






يونان ياولاد ..... يااستاذ منير يا استاذ فريد
.... حرام عليكم ماكنة اللعب وقفت
((( يصمت الجميع )))



فريد يا نهار اسود


منير ياد المصيبه ، هانقول ايه لابونا كيرلس
دلوقتى



يونان معلش ماتشغلوها تانى وتكملوا مع بعض شغلكم


فريد احنا مانعرفش غير الزرار ده ندوس عليه يشغلها
وندوس عليه تقف



منير ادى اخره الخناق بتاعك


فريد انا برضه ولا كسلك واهمالك همه السبب


يونان وبعدين ياولاد انتو هاتتخانقوا تانى


منير انت مالك يا اخى خليك فى حالك


فريد هيه ناقصاك انت كمان (((
يدخل ابونا كيرلس ...... )))



ابونا صباح الخير يا ولاد


الجميع صباح الخير يا ابونا


ابونا ايه ده يا فريد حد يكلم عم يونان بالطريقه دى


فريد معلش يا ابونا اصل متدايق شويه


يونان حصل خير يا ابونا انا مازعلش منهم ابدا
دول ولادى وانا بحبهم اكتر من نفسى كفايه انهم تعبانين طول



الليل وسهرانين شغالين علشان هدايا
العيد كتر خيرهم



ابونا طول عمرك متواضع واب لينا كلنا يا عم
يونان



يونان يا نهار ابيض يا ابونا دانا يونان الغلبان
دانت اللي قدسك نفسك حلوه وبتشجع الخطاه اللى زييه عن اذنك



يا ابونا عندى شغل كتير هاروح اخلصه





(( يخرج يونان ويبقى ابونا ومنير
وفريد ))






ابونا خير يا فريد ايه اللى مزعلك .... ومالكم شكلكم
زى ما يكون فى ميبه حصلت



منير فعلا يا ابونا مصيبه كبيره


ابونا بسم الصليب ، خير يا اولاد


فريد ماكنه اللعب وقفت مش شغاله (( اثناء كلام منير يتوجه ابونا
لماكينه اللعب ))



منير
وحاولنا نشغلها كتير ومش راضيه والكميه اللى
قدسك طلبتها مننا مخل حتى نصها



ابونا دى مشكله كبيره جدا وعمرها ماحصلت ، يارب
ارشدنا علشان خاطر العدرا ومارجرجس



فريد مافيش عندك يا ابونا كتالوج للماكنه ممكن
يساعدنا



ابونا فعلا فى كتالوج لكن عمرنا ما استعملناه لان
الماكنه عمرها ماعطلت



منير طيب معلش يا ابونا ياريت تروح تجيبه
بسرعه (( يخرج ابونا كيرلس ويعود
بسرعه ومعه الكتالوج ))



ابونا ادى الكتالوج نفتحه ونشوف ايه سبب عطل الماكينه (( يفتح ابونا الكتالوج ويبداء فى القراءه ))


السبب الوحيد الذى يسبب عطل ماكنه اللعب هو
ان تفقد الطاقه التى بها



فريد يعنى
ايه انا مش فاهم حاجه



منير وعباره عن ايه الطاقه دى


ابونا (( مستمر فى الفراءه من الكتالوج )) الطاقه
عباره عن الحب الموجود بين المحيطين بالماكينه



(( ينظر الى منير وفريد .... )) وطبعا
انتوا طول النهار خناقات ومشاكل مع بعض ومافيش حب بينكم



فريد عندك حق يا ابونا


منير احنا كنا فعلا غلطانين .... طيب ايه الحل


فريد ازاى ممكن نشحن الطاقه دى تانى


ابونا (( يقراء من الكتالوج ....)) طريقة شحن
الطاقة ، من الممكن ان يقوم شخص اخر غير اللى شغالين على



ماكنة اللعب وغير الاب الكاهن ويقوم
هذا الشخص بشحن الماكنه مره اخرى



منير شخص
تانى ونجيبه منيين ده



فريد وايه هيه مواصفاته


ابونا (( يقراء من الكتالوج ... )) يكون انسان محب
محبه حقيقيه بدون اى مقابل ومستعد للتضحيه من اجل من



يحبهم فى تواضع وانسحاق قلب ويضع ايده
مكان بصمة اليد اللى فى الماكنه



منير اهوه المكان اللى بيقصده الكتالوج (( يشير
الى مكان البصمة فى الماكينه )) وانا كمان عندى الشخص ده



ابونا مين هوه


منير صديقى وصاحب عمرى ميلاد ده مستعد يضحى
بحياته علشانى هو دايما يقولى كده



ابونا طيب هاتهولنا بسرعه مستنى ايه


منير انا هاكلمه على الموبيل (( يتصل منير من موبيله على ميلاد ..... ))


الو ايوه يا ميلاد ازايك .... بقولك
ايه محتاجك فى خدمه فى الكنيسه ممكن تجيلى بسرعه ..... لاء يا اخى



خناقة ايه بقولك خدمه ..... بسرعه لو
سمحت .سلام .... انا هاروح استناه تحت وهاجيبه واجى






(( يخرج منير ويبقى ابونا وفريد
..... ))






فريد
على فكره يا ابونا الواد ميلاد ده مش هاينفع خالص انا عارفه كويس



ابونا هانعمل ايه بس معندناش غيره (( يدخل منير وميلاد ويسلم على ابونا ))


ميلاد سلام يا ابونا انا تحت امرك ، منير فهمنى
شويه عن المشكله وانا مستعد اعمل كل اللى قدسك تقلى عليه



ابونا قلى يا ميلاد انت بتحب منير صاحبك


ميلاد طبعا يا ابونا ده صاحبى الانتيم ومتربيين مع
بعض



ابونا ومستعد تعمل كل حاجه علشان خاطره


ميلاد اكيد


ابونا طيب
لو افترضنا مثلا ان منير كان عيان بمرض خطير ممكن تساعده وتخدمه لحد ما يخف



ميلاد حسب نوع المرض اللى عنده


ابونا طيب
لو احتاج منك كل الفلوس اللى انت محوشها علشان يعمل عمليه ممكن تديها له



ميلاد كل الفلوس ..... مش كتير شويه ممكن اديله
نصهم ويبقى يردهم براحته



ابونا ويمكن مايقدرش يردهم


ميلاد لاء كده ازعل منه انا محدش يستكردنى ياخد
الحاجه يرجعها تانى انما مايردهاش خالص يبقى اعذرنى يا
صاحبى
معرفكش



ابونا طيب يا ميلاد تعال حط ايدك عند ماكنه
اللعب هنا (( يضع ميلاد يده ولا تعمل
الماكينه ))



ابونا كتر خيرك ممكن تروح مع السلامه


منير يا خساره وانا كنت فاكرك صاحبى


ميلاد انت
جايبنى علشان تاخد اللى حيلتى وتقولى صاحبى .... معطلكش سلام (( يخرج ميلاد ..))



فريد مش قلت لك يا ابونا ده ماينفعش انا عارف الاشكال
دى



منير انا اسف يا ابونا كنت فاكره بيحبنى بجد


ابونا معلش يا منير اديك اتعلمت الصاحب الحقيقى اللى
بيحب مش اللى يقف معاك فى الخناقه ولا على ناصيه
الشارع
.... مش كده ، المهم دلوقتى مفيش حد تانى تعرفوه



فريد انا عندى واحد ..... صاحبى بجد مش زى ميلاد



ابونا انت متاكد منه


فريد طبعا يا ابونا .... صاحبى عاطف ده متربى فى
الكنيسه وعلى طول موجود فيها ليل ونهار



ابونا موجود ليل ونهار بيعمل ايه يا ابنى


فريد ده كمان من عيله غنيه وناس محترمين جدا


ابونا طيب اتصل بيه وهاته


فريد (( يخرج الموبيل ويتصل بعاطف ..... )) الو
ايوه يا عاطف عامل ايه انت فين ..... فى الكنيسه طيب هايل



عارف مكتب ابونا كيرلس ...... اطلع
بسرعه علشان عاوزك . شفت يا ابونا مش بقولك هو احسن واحد



يساعدنا صاحبى وانا عارفه


ابونا ربنا
يستر (( يدخل عاطف ويسلم على الجميع .....
))



عاطف خير يا فريد قلقتنى


ابونا ماتقلفش ولا حاجه احنا كنا عاوزين منك خدمه
صغيره



عاطف انا تحت امرك يا ابونا


ابونا ربنا يبارك حياتك ، قلى يا عاطف انت بتحب
فريد صاحبك



عاطف طبعا يا ابونا ربنا يعلم


ابونا يعنى لو احتاج منك مساعده ممكن تقدمها له


عاطف مساعده ماديه مثلا


ابونا مثلا


عاطف طبعا اقدمها له ، هو كام المبلغ بالظبط


ابونا عشرة الاف جنيه ، ممكن


عاطف ثانيه واحده يا ابونا (( يخرج الاله الحاسبه
من جيبه ...)) يبقى عشرة الاف فى ....... ومعانا 3.5
نطرح منهم ربعين فى الجدر التكعيبى للتسعميه


ابونا ايه يا ابنى اللى بتعمله ده


منير نظرية فيثاغورس يا ابونا


عاطف يبقى 16000 جنيه


ابونا 16000 بتوع ايه يا عاطف


عاطف المبلغ اللى هايردهولى فريد بعد السلفه


ابونا بس هوه هايستلف عشره بس منين جبت السته
الباقيين



عاطف دول الفوايد يا ابونا


ابونا فوائد على الميلغ اللى هاتديه لصاحبك


عاطف ولو هادى المبلغ لابويا هاحسب عليه فوايد


ابونا ونعمه الاصحاب يا منير


منير ليه كده يا عاطف كسفتنى


عاطف مافيش
كسوف يا منير يا حبيبى ، كل حاجه وليها تمنها



ابونا حتى الصداقه والمحبه ليهم تمن


عاطف اكيد يا ابونا


ابونا طيب تعال يا عاطف حط ايدك هنا عند ماكنه
اللعب



((
يضع عاطف يده ولا تعمل الماكنه فيرفعها ))



ابونا قلى يا ابنى يا ترى التمن اللى دفعه فيك
المسيح حسبته بكام يا عاطف



عاطف اااا لاء اصل ...... دى .... دى حاجه تانى
يا ابونا



ابونا لا تانى ولا تالت روح يا ابنى وراجع حساباتك فى
حاجات كتير قوى مش ممكن نقدرها بتمن






(( يخرج عاطف حزين منكس الراس
............. ))






ابونا وبعدين يا ولاد مافيش فايده هانجيب منين
انسان عنده صفات المحبه الحقيقيه



منير يعنى مافيش هدايا فى العيد للاولاد بتوع
الكنيسه



فريد دى اهم حاجه فى العيد هيه الهديه بتاعته


ابونا ((
يجلس فى حزن )) ..... اكشف يارب عن عنيه
لارى مشيئتك



منير تفتكر مين ممكن يكون بيحبنا ويستحمل كل
اللى بنعمله فيه بفرح وبمحبه



فريد وكمان مستعد يضحى بنفسه علشان خاطرنا .....
اعتقد الكلام ده مابقاش موجود دلوقتى



ابونا (( يقفز من مكانه ...)) لاء موجود يا فريد
لقيته



الجميع مين يا ابونا


ابونا عم يونان


فريد عم يونان الغلبان


منير الفراش بتاع الكنيسه


ابونا هوه مافيش غيره ، شوفوا انتو بتعملوا فيه
ايه وهو محبته ليكم عمرها ما اتغيرت وطول عمره بيخدم فى
الكنيسه
وبيحب كل اللى فيها كبار وصغار روح يا منير انده له بسرعه



منير حاضر
يا ابونا (( يخرج منير بسرعه ....))



فريد معقول يا ابونا عم يونان الراجل الغلبان
اللى بيكنس وبيمسح الكنيسه تكون محبته اكبر من اصحابنا
وزمايلنا
ده درس كبير قوى الواحد مش ممكن ينساه



ابونا علشان ماتستهونش ولا تتكبر على اللى قدامك
ربنا اختار جهال العالم علشان يكونوا رسل ومبشرين



ممكن عم يونان يكون الاصغر وسطينا
لكنه الاعظم فى عنين ربنا
(( يدخل منير ثم يونان خلفه ))


يونان
خير يا ابونا الاستاذ منير بيقول ان
قدسك عاوزنى



ابونا تعال يا عم يونان اصل انا حسيت انك زعلان
من منير وفريد وحبيت االحك



يونان معقول يا ابونا ازعل منهم دول ولادى وهمه
اكيد بيفهموا ويعرفوا احسن منى



ابونا يعنى لو طلبوا منك حاجه تديهالهم يا عم
يونان



يونان اديلهم عنيه وروحى كمان يا ابونا هو انا
استاهل انهم يطلبوا منى حاجه



ابونا تديهم عنيك وروحك مقابل ايه يا عم يونان


يونان مقابل ايه كيف يعنى يا ابونا .... بدون
مقابل طبعا هو المسيح لما قدم حياته لينا كان خد مننا مقابل



وبعدين قدسك علمتنا وقلتلنا مجانا اخذتم
مجانا اعطوا



ابونا طيب تعال يا عم يونان حط ايدك هنا عند
ماكنه اللعب






(( يضع عم يونان يده فتعمل
الماكينه ))






منير اخيرا الحمد لله


فريد احنا النهارده اتعلمنا درس كبير قوى وانت السبب
فيه يا عم يونان



ابونا فعلا وياريت تكون هيه الهديه اللى نقدمها للسيد
المسيح فى عيد ميلاده اننا نتعلم المحبه الحقيقيه المحبه



اللى مستعد صاحبها انه يبذل نفسه بكل تواضع علشان
خاطر اللى بيحبهم



يونان زى
رب المجد بالظبط لما تواضع وجه للعالم واتولد فى مزود حقير علشان محبته لينا صح



منير صح يا عم يونان


فريد انت اللى صح واحنا اللى كنا غلطانين


ابونا يالله بقى نعوض اللى فاتنا ونشوف الشغل
اللى ورانا ................................



النهــــــايه





ليكن كل عمل يارب لمجد اسمك القدوس
الرجوع الى أعلى الصفحة اذهب الى الأسفل
 
اسكتشات عيد الميلاد وراس السنة
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 ::  °•.†.•°المنتديــــــات المسيحية°•.†.•°  :: الخدمة و الخدام-
انتقل الى: